شعبي يوماً أراد الحياة
إستجاب القدر للأمنيات – جواز سفر مختوم بطبعة
تذكرة مغادرة – روحة من دون رجعة

قالوا: "سنة زمان فترة سماح – بعدها لازم تنتقل"
كأنّو ما في غير خيار متاح

داخ بالفكرة –
داق خلقو – نقز من الفكرة
يلّي شافو، حسدو ع القرار –
وهوّي، الفكرة محتقرها

قالوا: "إحمد ربّك – قلّو شكراً"
قلّهن: "مش ناكر جميلو – بس ناكر الغربة
يا ربّي!
من يلّي راحوا وما رجعوا لازم نآخذ عبرة!"

نصب الخيم و الأحلام ع أبواب السفارة
والطموح طبعة على بسبوري –
بفضّل أنصب خيمة ع أبواب القصر الجمهوري
وإطمح غيّر النظام...  





عزيزي الإنتربول – وأمن المطار
سلام

عزيزي الإنتربول – وأمن المطار

غربت الشمس عالغريب وغرق بوحشة الغربة –
وحوش الغرب –
سواد الرعب من العرب –

فرنك موجود – موجود إحتمال فرص العمل
موجود الأمل
أو طار مع ثالث عصب إنفجر
بـ بلاد ما فيها ألمازا تآنس الضجر

صعب
مليون نوع بيرة – ومليون ثقافة مخلوطة
بمليون شكل
مليون سنة ضوئية بعيد عن مكان القلب

صعب
تحت الأرض مطمور مع مليون نفس
من مليون لون – مليون منطقة وكون
من دون كلمة الكل بيركض لمّا يرنّ الجرس
الحيّة بتفتح تمّها – الكل بياخذ نفس

أدراج – أدراج
نزول – نزول
ممنوع الغلط – صعب الرجوع
ممنوع الغلط!
جالس – إمشي مثل القطار
جالس!
تحت الأرض ما في حاجز – ما في كوع
وقطوع العبقة – وقطوع جوع
تحت الأرض، ما في حدّ
بس الطريق مقطوع صوب البحر

بهالمكان ما في جَزر – ما في مدّ
ما في مزح أو جدّ أو جدل
الجدليّة الوحيدة:
أي حيّة لازم تآخذ بدل – ع أي أساس إنوضعت خرائط تنظيم النقل؟

صوت الجرس ردّ العقل مصروع...



بين المباني قاعد – عم إنشر المنظر
لساني ساكت – حبري دارج
عم إنخر الورقة
عم إفجر بـ لحظة – وطفّي بأخرى
عم إهمد بالأحرى
عم أصمد
عم قاوم جنوني، بسكوتي
بس تفلت شي كلمة – بتطلع النبرة

مش عارف لو عم أضحك ع قدري –
أو قدري عم يضحك عليّي
في صبيّة – حلوة – شقراء – كوريّة –
لابسة كوفيّة –
وقاعدة بالقهوة بـ "تورونتو"

غريب أمرها هالقضيّة – وصلت للمجرّة
ونحنا جوّا الدار، شالات مستوردة –
ومنعتبر حالنا من "الشعوب الحرّة!"



وبعد،
مجرى الحديث مفقود –
مش واصل لـ عندي إلّا طراطيش



دائماً نفس الحدث عم ينعاد –
بتضوج – بتصرخ: "خلص!"
صوتك يبصعصع –
بيطير صوب العدم – بترجع ع السكون...


"حلمي أبعد من مدار العصافير!"

**

بنظم شعر – لعيون بيروت الحزينة ع فراقي
بنظم كلام وصور –
علقانة بفوضى الرؤى – غمق بحري وروائي
برسم شكل وخطوط –
بنظم بيوت مهدومة – رافعات بتنطح صفاء الغيمة

برسم خطوط الطول والعرض بشكل ألوق – بسمّيها المنطق
بتصدح الكلمات – عالسكت
عالسكت – الفوضى تتبلور على الصفحة –
بيطلع شعر ضوضائي

بنظم حبر – خبر الوفاة – أمل الحياة
دمع الفراق – الذكريات
رحلة رفاق الدرب ع دروب مختلفة

بكتب نظام السير بمدينة إنعدام الليل
وإحتمال الخير –
قلوب ع بعضها بتلفي – لقاء الجروح بـ يشفي

بسرق النور من القمر
بسرق عطر من زهر الليل
بسرق حبر من قلب موعود باللقاء
بسرق وتر من عود إنكسر
بعزف لحن مشتاء لـ بيروت

بسرق خطوط الشمس – بغزل خيوط الجسر
بأعبر – بينكسر
بأحتقر دربي – بإنعزل
بإنكبّ عالورقة – بأنفجر
بأبكي ع كربي – بأغتسل
بوعى ع حالي – بتعقّل
بحمّل عتادي – بتوكّل

صادق بخطوة بآخذها
وبُعدها، بًعد حدّ النظر
أبعد من كمّ الجور عالطريق
وعوائق الصخور بالوعر

بسرق حرف من مكتوب بظرف مختوم – مخبّئ بين الكتب
بغضّ النظر عن كلّ الخلايق
بركّز نظر ع البكرا – الفكرة – الشنطة –
الدّرب –
وبروح...