"paabot" poems
100221
Nauuna pa tayo sa mga alitaptap
Sa paggayak patungo sa dilim,
At doon sa papag ay sabay-sabay nating iitiklop
Ang ating mga paang napuno na ng alikabok
Para lamang mag-“indian sit.”
Ang ating mga halakhaka’y
Nagmistulang musikang humihele
Sa pandinig ng ating mga magulang
At ito’y mangingibabaw sa liblib na tahanang
Puno ng pagmamahal at pagmamalasakit.
Tunay ngang payak ang ating pamumuhay —
Tayo’y magsisilapit sa ginagawang liwanag ni Itay
Mag-uunahan na parang sigurado na kung sino ang taya,
Kung sino ang mag-aabot ng gas o posporo
Sa tuwing naisasambit ang mga salitang, “Nak, paabot.”
Nais sana nating hindi kumurap
Pagkat tayo’y nakatututok habang pinagmamasdan
Ang nagmimitsa’t nagniningas na apoy.
At ito ang liwanag na aasahan nating
Magbubuklod sa atin papalayo sa dilim
At magkukulob sa nasasakupan
Ng sinag ng ating mga paningin.
Hindi na natin alintana
Ang init na dumarampi sa ating mga balat
At tayo’y mapupuno ng pagkamangha
Sa liwanag na itinuring nating mahiwaga —
Mahiwaga sa ating mga matang
Walang ibang nais kundi magliwanag na.
Hindi na rin natin namalayan ang bawat segundong lumilipas,
Maging ang mga dahong kumukupas
Sa paghimlay nito sa ating mga paanan.
Panahon ay dumaraan ngunit hindi nang palihim;
At panahon din ang susukli
Sa mga alaalang nais nating manatili.
Oct 2, 2021
Oct 2, 2021 at 10:22 PM UTC
Paabot naman ako ng hawak **** yosi
Kahit makihits na lang dyan sa hinihithit mo
Hindi dahil magkapareho tayo ng bisyo
Gusto ko lang masubukan bumuga ng usok,
kasama ang mga salitang hindi kayang banggitin
Papasa naman ako ng tinatagay **** alak
Kahit isang shot na lang dyan sa iniinom mo
Hindi dahil magkapareho tayo ng bisyo
Gusto ko lang malaman kung paano sumuka,
kasama ang takot na matagal ng sinisikmura
Pahingi naman ako ng isang halik galing sayo
Kahit padampi lang sa mga labi mo
Gusto ko lang kasi maramdaman kung paano mahalikan ng isang labing makasalanan,
Mga labing kahit kailang ay di ko narinig
magpahayag ng tunay na nararamdaman
May 19, 2017
May 19, 2017 at 12:01 AM UTC