#siday
Waray ngani ak' sabot han imo paglakat.
Kay waray ka na man han akon pag-buhát.
Mamingaw na an sulod han ak' paglagos,
Waray na'n imo mga panapton nga hinipos.
Nalisang ngan ak' panginano kon hain ka,
Bangin la baga ginkalasan, bangin nagruruha-duha.
Nagpruyba pa ngan ak' pagsangpit han ak' kalugaringon.
Nagpruyba pag pinsar ngan pamahung-pahong.
Baga sugad la ak' hin bata nga nawawara,
Nga di maaram kon magpapadayon o mahunong na.
Kay uunanhon pa an mga bukad han tanaman,
Kon gin-gabot na an mga gamut nga tinutudkan?
Maghuhulat ako magmaiha man an panahon.
Bisan pa an kasing-kasing pagtudkan hin balagon.
Pero kon igbuot han takna nga asya na ine an katapusan
Waray na ada sadang nga rason nga utro liwat magtikang.
Dec 13, 2025
Dec 13, 2025 at 7:10 AM UTC
Bulan nga mapawa,
tulay nga halaba.
Mag-iihap ako manapulo,
dagmit, ngan tago nala.
Ayaw gud la pag-aringasa,
Ngan ayaw la ako pasabta.
Kay dire ako kakapuyon pag-biling ha imo.
Bisan diin ka pa nga dapit sumuksok ngan tumago.
Bisan man kon maiha an imo pag-hulat
Ngan bisan kon makuri ha imo pag-lanat
Dire ka unta sumhan ngan magmahay
Kay ini nga gugma dire la liwat minulay-mulay.
Ayaw la pag-singgit, ayaw la panmaya,
Ayaw pag lakat, ngan pag pabiling ha iba
Pasagdi la kon an takna magmaiha.
Kay ako nala an mahuring, bungka!
(Inspired by the piece 'PANAKMO' by JFD)
Dec 12, 2025
Dec 12, 2025 at 5:31 AM UTC
Sukla daw it akon palad
Kitaa kon sakto ha imo kamot.
Hinay-hinay an pagdaop,
tinalagudti nga pagdukot.
Sukla daw an akon bado,
Bisan kon hukal, makaka-iban gad man hit kahagkot.
Sukla gihap an akon bayhon,
Ngan kitaa an dagway kon nag-iiba.
Hinay-hinay ba nga nawawara,
Sugad han adlaw kon kulop na?
Sukla man an akon kalibutan,
Ihapa an oras ngan mga adlaw.
Sukla an akon mga inop ngan ungara,
Pati na gihapon an mga pangandoy nga makuri makuha.
Sukla man an akon kasing-kasing,
Kon igo man liwat suklon.
Sugad-sugad ak hin bata,
Nga nahadlok la gihapon.
Kay ha mga linya nga imo gin drowing, may ada tagsa-tagsa nga kolor ngan hurma.
Mga tigaman han sukol nga makuri na mapara.
Ngan sugad man hiton karida han panahon,
Ha kadamo han bituon, han mga baras ha baybayon.
An gugma, kon nananaringsing, makuri man liwat suklon.
Oct 26, 2025
Oct 26, 2025 at 8:46 PM UTC
uli na ha akon,
bisan kon masumo man pamation,
an imo tingog kon nauurit,
bisan kon usahay waray rason an imo ka hangit.
balik, lingi-a ako bisan la kadali.
bisan la pira ka minuto,
nahihidlaw na ako ha imo.
han imo mga hangkop nga nadulót ha panit,
ha imo bayhon nga makaruruyag,
ngan im-im nga matam-is,
duaw kadali.
pero kon dire ka na gud,
waray ko na mahihimo.
dire na ako magpipirit,
kay adton nag-labay,
makuri na pag-balik.
Aug 30, 2025
Aug 30, 2025 at 12:02 PM UTC
Balik la anay pag katurog,
Samtang na hangkop an bulan ha mga bituon.
Waray pa man tumugaok an mga manok,
Waray pa gihap ka papas adton kahagkot.
Ipiyong la anay an imo mata,
Hirayuay pa ma aga,
Ma-iiha ka pa hit hulat.
Higda la anay, niyan na buhát.
Aug 30, 2025
Aug 30, 2025 at 11:23 AM UTC
Nagugupong it akon huna-huna,
Dire ak' maaram kun matipakain.
Madaparap it akon pangita-an,
Nawuwurok gad it akon kasing-kasing.
Hain na ba it dalan?
Giyahi gad ako.
Nahadlok ak mag-usahan
Dire na ak' maaram kun mag-aano.
Susubayon ko ba an agi-an?
O mag-iinukoy na la?
Huhulaton ko pa ba an ka-agahon?
O mag-tuturaw na la?
Ambot. Di ak' maaram.
Usahay karuyag ko nala mawara.
Mag-padara ha kahanginan,
Ngan ipiyong an mata.
Jun 26, 2025
Jun 26, 2025 at 12:38 PM UTC
Kun bumisita man it mga alien,
Mabibido ba it ak' huna-huna?
Kakalasan ada, o mahadlok siguro.
Mawuwurok, malilisang— di' ak' sigurado.
Kun bumisita man it mga alien,
Ngan hira humugdon ha ak' atubangan,
Tutuoron ba ak' hit mga tawo nga ak' susumatan?
Bangin la hira mangalot, bangin la ak' nira pag tinawa-an.
Kun bumisita man it mga alien,
Ha ira spaceship mangangaro ak' hin pwesto.
Dadad-on ko t'ak taklap, ngan an paborito ko nga libro.
Dadad-on ko gihap an ak' tasa pati gihapon an sista nga sintonado.
Bangin an pagrayhak, ha iba nga bituon nakatago.
Kay dire ko na akos pag-antos han kasakit nga tinago.
Maupod nala ak' kun daraon man ha lain nga planeta,
Kontra ha higayon nga makit-an ko ikaw nga malipayon na ha iba.
👽🛸
Jun 25, 2025
Jun 25, 2025 at 9:53 AM UTC
Hin-o ba in makakabaton hine nga akon pakiana
Nga kon diin inen katilingban napupuno hin pagruha-duha
Marisaw bisan ka kumain padayon an pangarawat
Kulang nala ako in mamangno hini dinhi nga ngarat.
Adton mag-aramyaw dire na naggigi-asihay
Bisan man magkasugat ha dalan in waray na buslungay
Adton magkakapamilya natutuyaw hin pasukod-sukod
Ginhihinay-hinay pag-ruba han ira madig-on nga katukod.
Adton mga tawo in nawawara an kamag-sarangkay
Pipira pira la iton nga politiko pero yinukot-yukot it nag-aaway
Na aalupan na hin grabe nga kahugaw iton hangin
Waray na an pagka-urusa, adton anay mag-upay yana in nag-lain.
Dire na ada kita nakakabati hadton guliat han gugma
Kay nalulumay na kita hadton ka-ipa han kwarta
Waray na adton anay maupay nga pagkasaragbot
Nagpabilin nala yana an kaawa ngan an makalilisang nga kahalot.
Adton iba in nasasagipo la han pag-pinadungog
Nadugang la lugod inen panahon hin pag-alinsuog
Dire na man gud mahimo na ha kada tagsa magpa-abat hin gugma
Kay bisan ngani iton karagta-tawa ngan mga ngirit plinastikay nala.
Ambot uunanhon ko la ine hin pagbaton
Pakiana nga makuri gud usahay intindihon
Nahingain na an mga tawo nga nagkaka-abuyon?
Dire ba kita puydi pumili nga dire salapi iton rason?
Unta sangkay, abrihan mo iton imo huna-huna
Ha mga pabati ngan pagpakaraot dire ka unta magpadara
Kay inen piniliay sagrado gud ngan baraan
Ayaw pag pasipara pagdum-it hadton imo ngaran.
Unta imo madunggan kon ano man iton yakan han imo dughan
Ngan adton boses han kamatuuran imo unta pamati-an
Ayaw pahulop hinin nagliliyong liyong nga konsumisyon
Intindiha nala kay amo ine an darahig han eleksyon.
Jun 23, 2025
Jun 23, 2025 at 9:55 PM UTC
Ginku-kugos ko an ulunan nga imo gin gamit.
Samtang an mahagkot nga hangin naharumhom ha akon panit.
Nag-hihinulat ha imo pag-balik, bisan san-o, bisan diin.
Gin-gapos ha tuna han mga hinumduman nga nagpa-bilin.
Gin-tuman ko an aton saad ha ilarom han kahoy
Nga mag-huhulat ako bisan an kalibutan magubot ngan magmasamok.
Iilubon an kamingaw nga ha dughan nag-aawit
Aantuson an duro nga kasubo ngan kapait.
Ngan umabot gihap an takna nga ak' ginpamulat
An im' pag-balik ha akon kasingkasing nag-aghat
Napuno'n kalipay, pag-laum sugad hin balagun nga kumanap.
Saksi an langit, unta dire la patahap.
Ngan yana kay aanhi ka na man
Pipiriton ko pag-huring an imo ngaran
Pamad-a na an luha ha im' mata, sipat la ha ak' bayhon.
Samtang hangkop mo an ladawan ha bawbaw han akon lungon.
🍂🌻
Jun 21, 2025
Jun 21, 2025 at 4:28 AM UTC
An kalamay ni Mana Basyang, bantog ha bug-os nga baryo.
Matam-is hin duro, an rasa makalilipay kuno.
Damo an naruruyag, pirme halaba it pila.
Tikang hit alas dose hit udto, ngadto't alas tres hit aga.
Usa ka adlaw, akon gin pruyba pag himo.
Ginsunod ko an resipe, sugad hin usa ka sikreto
Pero an akon nahimo, iba man an hitsura ngan baho
Baga hin asukar nga may semento.
Nahipausa ako, ano an iya tinago,
Kay an iya kalamay, diri gud matutupungan
An tinuod, an iya sikreto
Kay diri man asukar an iya ginagamit ngay-an.
Apr 28, 2025
Apr 28, 2025 at 9:36 AM UTC
Mayda ko nakita-an ha baybayon.
Gin-anod tikang ha hirayo
May sulod nga papel, pinutos hin maupay.
Mga pulong nga puno hin mga pahaliday.
Mahusay an kasurat, sugad hin awit,
Nagpapahayag hin gugma, ha ak' kalag sinmangpit.
An akon kasing-kasing nalipay intawon
Kay an mensahe para man ha akon.
Pero ha ubos han surat, mayda ngaran.
Diri akon.
An surat ha botelya
Para ha akon nawawara nga kalugaringon.
Apr 28, 2025
Apr 28, 2025 at 9:22 AM UTC
Samtang diri pa kita,
Pag aadman ko la anay ada,
Pag higugma hit ak' kalugaringon
Pag hulat hit imo pag baton.
An pag higugma, ibubutang la anay ha ref
Puputson hin makaruruyag nga surudlan,
Hihipuson hin maupay,
Ngan isasalin para kinabuwasan.
Babantayan ka tikang ha hirayo,
Iihapon an kada segundo
Itatago la anay an bukad ha kamot
Ngan an mga pulong nga karuyag ipaabot.
Ipapaagi ko la ada ine anay
Ha mga sininsilyo nga piyesa ngan pahaliday
Ngan tungod nga waray pa umabot an panahon,
Susundon la anay an balud, ngan ha baras iglulubong.
Kumusta ka daw la?
Hin-o taada hit im' huna-huna?
Ambot. Diri ak maaram hit imo ibabaton.
Sanglit hihigugmaon ko la anay ikaw hin hilom.
(sugad hin bring home, inen gugma, ha ref la anay hihipuson)
🌻
Apr 10, 2025
Apr 10, 2025 at 10:41 AM UTC
Usahay diri ko ma pinsar it akon kalugaringon
Maaram ka man ha ak' nga baga awdunon
An pitik han ak' kasing-kasing bagan nag titikadaku
Baga hin nagdadagmit, an oras inundang, ambot kay ano?
Kon an hangin na huyop ha akon panit
May-ada usa nga huring nga ha ak' talinga nasangpit
Ha ak' pag ampo, an ngatanan nagin matin-aw, ngan klaro
Kay dinhi nga takna, aanhi hi ikaw ngan ako.
Ikaw gud an gimamaupayi ha ngatanan
An pinakamahusay nga gin-larang
Salamat han kalangitan, tigda ka la dinmaop ha akon
Ngan hini nga higayon, diri la gihap ak' maaram kon ano an rason.
An sugad ha imo, labaw pa hin inop
Sugad hin ilayat nga bukatkat nga makuri madakop
Ngan han kahulog han bitoon, asya'n pag hangyo
Kasing-kasing nga puno'n kalipay, duro an pag lukso.
Baga hin diri ka naukoy dinhi ha tuna
An imo kaanyag diri harumamay, duro ka makaiipa
Sugad ka hin prinsesa han hitaas nga lantawan
An magbarantay han baraan nga turumbanan.
Dad-a ako ha imo pag lakat
Ayaw ak baya-i kay nadiri ak' paglanat
Ikaw an akon puruy-anan, ha imo ako mapabilin
Tim-os nga gugma nga ginmapos ha akon kasing-kasing.
Feb 4, 2025
Feb 4, 2025 at 8:53 AM UTC
Lubad na an surat nga imo gin hatag
Waray na an katam-is ngada han mga saad.
Guba na gihapon an ungara nga natukod
Putos na hin balagon an kasing-kasing nga mabanhud.
Na pagal na an mga tiil han pag linakat
Na paol han pag biling ngan pag lanat
Han imo bayhon nga ha inop ko nala nakikit-an
Nasangpit han ngarat ha mapait nga kamatuoran.
Gin puo na an mga si-ot han tanaman
An mga banwa nga ha tuna nakaka ulang.
Na-bungkag na an payag, nga anay pahuwayan
Waray na adton landong nga sinisirungan.
Ngan yana, titipa-unanhon ko man hin pag unhan?
Kon an akon kasing-kasing gin huhuring la gihap an imo ngaran
Nga bisan kon an kalayo han im' gugma nawara naman
Adton baga mapaso la gihapon ha dughan.
Feb 3, 2025
Feb 3, 2025 at 12:53 AM UTC
Harayo ba it tikadto ha iyo?
Akos ba hin motor, tricycle, o awto?
O bangin pwede la liwat baktason
Kay pastilan, nalilingaw gad ak ha sarakyan intawon.
Kikitaon ko nala ada ha Google maps an iyo balay
Tuturutansyahon kun hain mahaw-as ngan masakay
Ig ba-budjet ko nala nga daan it ak' pamasahe
Mamamakiana kun hain dapit nga eskina o kalye.
Nahadlok man liwat ako mawara
Kay bangin iba nga balay tak hikadtuan
O bangin liwat waray ka dida ha iyo
Bangin an portahan ngan gate parehas sarado.
Matuktok ba ako? O tatawgon ko't im' ngaran?
Dire ak maaram—bangin ka liwat kalasan
Nagpipinangusig na ngan didi it iyo kaayaman
Kay dire nira kilala kun hin o taada hit iyo bungsaran.
Jan 27, 2025
Jan 27, 2025 at 3:55 AM UTC
Patay na an binhi nga akon gin tanom
Na uga an mga gudti nga dahon
Waray na sumaringsing an luyat nga sanga
Mamara na hin duro an tinatamnan nga tuna.
Waray na ka salbar han abono ngan tubig
Nadunot na an lawas nga inuuhaw ha dilig
Waray na paglaom nga bumuklad an biyuos
Nailiw an tuna nga ha iya mga gamut nakagapos
Waray na ak umutro tikang hadto
Gin sunog ko na gihapon an iba nga liso
Ngan pati an tanaman nga minangnuan
Naglarab dida ha butnga han kasirakan.
Bangin dire gud la ak maaram mag tanom
Bangin an gin hatag nga pag tagad kulang gihapon
Sinipat ko nala an adlaw, ngan ha langit humangad
Samtang an hinulid nga binhi, nag dudugo ha akon palad.
🌱
Jan 26, 2025
Jan 26, 2025 at 10:06 PM UTC
damo na hin duro an 𝘴𝘵𝘪𝘤𝘬𝘺 𝘯𝘰𝘵𝘦𝘴 haak lamesa
takip-takip an kabutang pero dire ak nakakabasa,
han mga pulong nga akon nasurat,
mga letra nga nag buru-balighot ngan nag papaplanat.
waray na gihapon tinta an akon 𝘣𝘢𝘭𝘭𝘱𝘦𝘯 ubos na an paypay han 𝘯𝘰𝘵𝘦𝘣𝘰𝘰𝘬 nga sinurat-suratan hin magka-durudilain nga pangandoy, mga pulong nga ha inop nala natutuman—mga pulong nga karuyag ko unta mabatian—
tikang haimo mga im-im, an katam-is han mga saad nga sugad hin dugos,
an mga hinumduman nga sugad hin daan nga telegrama, nga ha akon kasing-kasing nakahipos.
gintatapo-tapo na an mga surat nga linukot, waray na ka abrihi tikang han kaparong han lanterna han aton gugma.
nga an dagaang nga an hadi akon na aabat, tumaghom na tikang han imo paglakat.
ngan sugad han 𝘴𝘵𝘪𝘤𝘬𝘺 𝘯𝘰𝘵𝘦𝘴 nga buot mag pahinumdom, akon man liwat nangalimtan an pag-lara han gugma,
waray na punto an mga sinurat, ighahapil ko na la ada.
Jan 26, 2025
Jan 26, 2025 at 9:59 AM UTC
nalutaw an husay
han imo pag-sidlit,
pag-duaw hin madaliay
ha ka mataghom han gab-i.
🌕
Sep 18, 2024
Sep 18, 2024 at 6:56 AM UTC
Katunga la han im' bayhon an ak' nakit-an
Natatabunan han sulhog han suga ha dalan
Ambot kun hi ako ba an imo gin susurob
Kay nag dadali ak' hadto pag lagos tisakob.
Waray na ngan ak' panginano
Baga malipong na gihap an ak' ulo
Bangin man ngani inop la adto
Kay baga madaparap ngan dire klarado.
Nganak "tuod ada an hurob-hurob an hadi"
Nga mayda daw hit nga dapit napakita nga babayi
Batan-on ngan kadaan an panapton
Nakakirugpos hin busag, ngan nagtitinukdawon.
Ambot. Di ak' maaram kun ano't tutuoron
Di man ngani ak' nakaklaro gihapon
Pero hadto daw nga takna, may'da hira nakita
Natukdaw ha dalan, na duaw ha am' bintana.
#
Aug 11, 2024
Aug 11, 2024 at 11:46 AM UTC
mabalik ka pa ba?
sumati la'k dayon
kay bis inin kasing-kasing
waray na ba iiliwon.
🥀
Jul 8, 2024
Jul 8, 2024 at 9:26 AM UTC
nayakan an repairman, waray man problema
dire man daw liwanan, ngan nadara pa
pero pamati ko, ruba na gud ada
kay waray ka na man tatawag, waray ka na magpakita.
🥀
#siday
Jul 7, 2024
Jul 7, 2024 at 8:00 AM UTC
gin huring han hangin
adto'n imo ngaran
kamaupay pamation
naharumhom ha ak' dughan.
🍃
Jul 7, 2024
Jul 7, 2024 at 7:22 AM UTC
nakalit ha dughan
an kahidlaw haim'
daw sugad-sugad hin tanom
namukad, nananaringsing.
🌿
Jul 6, 2024
Jul 6, 2024 at 10:31 AM UTC
dinmaop kadali
pagpiyong nak mata
landong ngadan imo hangkop
ha ak pag pukrat nawara.
🥀
Jun 1, 2024
Jun 1, 2024 at 7:25 AM UTC
naharok ha palad
an imo kaanyag
dalikyat adto'n pagpitad
duro ka makaruruyag
⛈️
May 31, 2024
May 31, 2024 at 10:22 PM UTC