उन्दैनिफ्रायनो आङो बिखौ मोजां मोनो होननायखौ
बियोबा फोथाइदोंना फोथायाखै आंथ' मिथिलिया
बिनि अन्थाव बाथाव आंनो बुंनाय रावफोरखौ
खोनासङोब्लाथ', बियो आंखौ मोजां मोना बुंनो हाया।
मोजां मोननाया मा? नों आंखौ मानो मोजां मोनो?
बिब्दि होनना बियो आंनाव सोंलु सोङोब्ला
माबोरै बेखेवगोन माबोरै फोरमाइगोन जायो गोसोआ,
बुंनोलाय हायो आंबो सावथुनफोराव नुनाय खोनानायबादिनो,
आंनि अननाया फैलाव अखोरां आरो मोजां मोननाया गोथौ लैथोबादि।
नाथाय, आङोदि बैफोरजों रुजुनानै
आंनि अननाय-मोजांमोननायखौ मुं सुनो लुबैयाखै
आं रुजुनो लुबैयो खालि, आंनि बिखा आरो थैजोंसो!
जेराव गुसेब बिखाब्लाबो दङोल' गोग्गो हां
गैया गुवार अखोरांनिबादि बारहुंखा, हाद्रि-बाला आरो जोमै दाखा,
जेराव थौलेब्लाबो दङोल' गोजा थै, सोलेरनि दैदेनगिरि रैखागिरि
गैया गोथौ लैथोनिबादि मिथिसयै गिख्रंथाव आरो गिख्रंथाव गुथाल।
बियोबा बुजिगोनना बुजिया आंथ' मिथिलिया,
थेवब्लाबो आंदि बेखौल' बुंनो सानो "आंनि मोजां मोननाया नैथि गैयि सैथो!"
बिनि रायज्लायनाय, आंजों लोगो हमज्लायनाय
सोरनिबा सोंनायाव बिनो गावखौ Just friend होनना बुंनो होनाय
बियो जोबोद मोजां मोनो, जानो हागौ!
नाथाय, आंथ' मिथिलिया!
बिनि खुसियावनो आंनिबो खुसि
बेनोथ' मोजां मोननायनि ओंथिया,
अब्लालाय माथो जानो बियो जुदि गुबुन सोरजोंबा खुसियै दङो
बियोथ' खुसिना, अब्लालाय मोजांसो!
गावनि रैरुब आखायजों
गुबुन सोरनिबा आखाय हमनानै लाथोंना बियो
थेवब्लाबो मोन्दांथिखौ आंनोथ' मोनखायो,
गुबुन सोरजोंबा बियो मोजां मोननायनि खोथा रायज्लायाथों मानो
अननायाथ' आंनावनो आबुं जाखायो,
बियो खाथियाव था एबा दा था
आङोथ' मेगन मेसिबब्लाबो नुखायो,
गुबुन सोरनिबा थाखाय बियो Status लिरब्लाबो
नाथाय सोदोबफ्राबोदि आंनावनो नाखायो।
नाथाय, बियोब्ला बिब्दि सान्दोंना सानाखै...आंथ' मिथिलिया!
© B Zealous
12/10/2019
Oct 12, 2019
Oct 12, 2019 at 4:55 AM UTC
नंखाय नङा होनना फोथायहोनो दायो गोब्राबसै
आं जेरावनिफ्राय जागायदोंमोन बेवनो फिन मोनफैनायसै
थांखि सोलाय-सोलाय गिदिंबायना बेंखन लाथिख'नि महरसो मोननायसै
मोनसेल' थांखिनि थोंजों लामाजों हान्थिनो रोङैआनो आंनि गोरोन्थि जानायसै।
जाफुंथारगोन होनना फोथायहोनो दायो गोब्राबसै
दैबानानि फेंफोनाबादि आंनि थांखिया थरफा-थरफा रानलांनायसै
अनजिमा गैयै दैबानानि फेंफोनाखौ बयबो मिथिखागौसै
आंनि थांखियाबो दायो बेजोंनो रुजुजाखागोनानोसै।
सैथोथार नङा होनना फोथायहोनो दायो गोब्रासै
उन्दैनि सिमां, दान्दा गोलावजों हाथ'रखि थुख्लायनो साननाया जाफुङाखिसै
बेसेबांबा समाइना-रमाइना नुनाय सोरांखौ आं मोनमाराखिसै
फ्लाम-फ्लिम गुबुननि मोफ्लामनाय सोराङाव मेगनासो आनज्लेद जागारनासै।
बिब्दि जेबो जायाखै होनना फोथायहोनो जोबोद गोब्राबसै
मानोना आङो लाथिख' महराव हान्थिजेननाय लामाजोंनो हान्थिफिन्नांनायसै
आंनि थांखिफोरखौ आङो मोनसेल' गोजोरै लाखिनो हाथाराखिसै
थोंजों हान्थिनांगौआव आङो सोरगिदिं गिदिंबाय थाफ्लांनायसै।
31/08/2019 ©B Zealous
Sep 5, 2019
Sep 5, 2019 at 11:12 AM UTC
समाइना नों सिखिरि सिखोला
आंनि गोसोखौ रंजानायजों आबुं खालामो
नोंनि गोर्बोनि गोथार अननाइखौ
आं सैथो-सैथोयै मोन्दाङो
नोंनि गोजों मेगन थाइनैयाव।
गोजों साननि सानरोदाबादि
नों आंनो रंजानाय होफैयो
जेब्लायबो आरो सानफ्रोम्बो।
समाइना अननाइजों आबुं
नों आंनि जिवमानि लैथोआव
सोर्गोनिफ्राय इसोरा हरनाय बान्था,
आं नोंखौ जेब्लाबो बोजबना लागोन।
जेब्ला आं नोंनि मोखाङाव नायो
नोंनि मिनिस्लुनाया आंनि गोसोखौ दुंलोबहोयो
जेन' नों गेलेनायखौ आं नायगासिनो
आंनि नोजोरनिफ्राय जानगारोङै!
Aug 27, 2018
Aug 27, 2018 at 10:32 AM UTC
सुबुङा साननाय
बेयो मोनसे राज्यो
जेराव दं गोजोन
जेराव दं अनलायनाय
आरो जेराव गैया आंखाल
जेराव गैया दुखु दाहा।
बैबादि राज्यो
जोंनिफ्राय बेसेबांबा बेसेबांबा
मोनहास'यै गोजानाव।
नों फोथाइ, आंबो फोथाइयो
बेयो जेब्लाबो सैथो-
मोजां हाबा मावोब्ला
इसोरजों अनजायोब्ला
थैनायनि उनाव
नों सोर्गोखौ मोनगोन
नों गोजोनखौ मोनगोन।
नंगौ............,
आंबो फोथाइयो, नोंबो फोथाइ
मोजां हाबा मावोब्ला
नों गाज्रिनिफ्राय थैगोन
नों गोदान जोनोम मोनगोन
नो मोजां मानसि जागोन
आरो गोजोनखौ मोनगोन
बयजोंबो अनजागोन
सोर्गोखौ नों मोनगोन
मानोना इसोरानो गासैबो
गासैबो एबा बयबोआनो इसोर।
अब्ला सोर्गोआ बबेयाव?
Jun 6, 2017
Jun 6, 2017 at 7:37 AM UTC
नुनो मोननाय नुनो मोनै
मोन्दांनाय मोन्दाङै
गासैबो बे मुलुगमायाव दं
मोनफ्रोमहाबो मुं दं।
जाय जिरादा मुलुगाव गैया
बिहा मुंबो गैया
एबा जायखौ जों मिथिथ'वाखै
बिहा मुंबो मोनथ'वाखै।
सोमजिनायनि उनावसो गासैहाबो
मोनफा-मोनफा मुं मोनो
नागिरै-नागिरै दिहुननानै
सुबुङा दोनो मोनफा मुं।
अब्ला बे मुलुगमानि
गासैबो मुं दंनायमानि
बे मुलुगमायाव दं
आरो बे मुलुगमायाव सोमजिबावगोन
मोनफा-मोनफा जिरादनि मुं।
Jun 4, 2017
Jun 4, 2017 at 10:21 AM UTC
Thousands of love stream
Flowing in this earth
Even never end thirsty
Without your love of heart.
Extensive above of the sky
Flying your besides
Calling the rain of love
Appealingly by loud cried.
Can't understand myself
Never end thirsty with others love
Because, for you only
My soul is the swallow.
May 29, 2017
May 29, 2017 at 3:17 AM UTC
रोजा-रोजा अन्नाइनि दैसा
बोहैदों बे बुहुमाव
थेवबोदि गांगाया आंहा
नङाब्ला नोंनि गोथार गोर्बोनि।
फैलाव नख्रांनि सा-सा
बिरबायदों नोंनि सेराव
लिंहरबायदों अन्नाइनि अखा
गाब्बायनानै खाराव-माराव।
मिथिला, बुजिला, सानस'हाला
गुबुननि अन्नाइजों गांगा रोंलिया;
नोंनि थाखायनो जाबाय
आंनि गोसोआ फानफेवालि।
May 28, 2017
May 28, 2017 at 1:10 PM UTC
सैथोआनो जेब्लायबो देरहासार
नंथारगौ होनना सोर बुङा?
गासैबो थार नङा
मानोना,
नंखायजोंबो जायो माब्लाबा देरहासार।
गावदां अखाफोरा जोबोर समाइना
नंथारगौ होनना सोर बुङा?
गासैबो थार नङा
मानोना,
समाइना नङा अखाफोराबो, थांनानै नायहैयोब्ला।
अननाइ होब्लासो अननाइ मोनो
नंथारगौ होनना सोर बुङा?
गासैबो थार नङा
मानोना,
अननाइ होब्लाबो माब्लाबा अननाइ मोनफिना।
May 19, 2017
May 19, 2017 at 7:52 AM UTC
दावखिबाद फंस्लदबाद
सुवा बायसेथ्रा
बेफोर मोनफा मोनफा खान्थि,
संसाराव, समाजाव
गावबा-गावनि राज्योआव
दानानै लानाय मोनफा आयेनखान्थि
बेजोंनो लाखियो सुबुंनि आब्रुथि।
इनाय हाबा, गाज्रि हाबा
बेफोरनिफ्राय बारगनो, सुबुंखौ हमथानो
दं जोंहा गोरा गान्थि, नेमखान्थि
बेनो जादों पाप!
18/05/2017
May 19, 2017
May 19, 2017 at 5:09 AM UTC
जोमै
गुफुर जोगां
खोरोमदाव खोरोमना
हायो नों बुहुम बिखायाव
अखा।
17/09/2016
May 2, 2017
May 2, 2017 at 10:48 PM UTC