Mahiwaga ka nga aking Pag-ibig
Tulad ng pagkahumaling ng mga mata ko sa iyo
Paano ko ba mabibigyang tuon ang sineng pinapanuod
Kung ang atensiyon ko ay nasa Iyo?
Mahiwaga ka nga aking Pag-ibig
Kagaya ng mga paa kong walang kapaguran
Aanhin ko ang destinasyon o pupuntahan
Kung sigurado namang masaya dahil Ikaw ay nandiyan?
Mahiwaga ka nga aking Pag-ibig
Kapareho ng mga kilig at tuwa sa aking damdamin
O kay hirap namang ubusin ang pagkain na nasa hapag
Kung sa mga ngiti mo lang ay busog na ang tiyan
Mahiwaga ka nga aking Pag-ibig
Dahil natutong makuntento ang pusong ito
Walang sinabi ang inaalok ng mundo
Sa kagandahang taglay mo
