#gabi
May sigaw ang puso ko na walang marinig,
Mga salitang gustong kumawala pero laging tikom ang bibig,
Mga tanong sa isip ko na hindi ko masambit,
At sa bawat gabi, pakiramdam ko’y ako lang mag-isa sa dilim.
May bigat sa dibdib na hindi ko maibaba,
Parang pasan ko ang mundo kahit wala namang nakikita,
Gusto kong umiyak pero tila walang luha,
Sa bawat paghinga ko, pagod lang ang dala.
Bakit ganito kung wala namang malinaw na sagot?
Bakit ang puso ko’y puno ng galit at takot?
Gusto kong kumawala sa hawak ng lungkot,
Pero may humihila sa akin pababa ito ang damdaming puno ng poot.
Gusto kong tumayo at muling lumaban,
Gusto kong hanapin ang liwanag sa daan,
Pero sa tuwing susubok akong kumawala sa kadiliman,
May aninong hahawak at ako’y ibabagsak muli sa kawalan.
Sana balang araw ako’y makalaya,
Sa mga tanong, sa galit, sa bigat na dala,
Sana ang pusong ito’y muling sumaya,
At hindi na muling hilahin paibaba.
Feb 26
Feb 26, 2026 at 10:46 AM UTC
Sa bawat iniisip kita tuwing hatinggabi,
Binibilang ang mga dahilan kung bakit nandito pa rin ako—naghihintay.
Kahit sa panaginip na lang tayo nagtatagpo,
Sana’y muling masilayan, kahit sa isang saglit na totoo.
Hindi ko hinangad ang ganda—babaw lang iyon sa paningin.
Hindi ko hinanap ang bait—karaniwan na lang iyon kung iisipin.
Hindi ko kailangan ang yaman; wala itong halaga sa akin.
Narito pa rin ako dahil sa iyo, at sa iyong mga turo.
Tinuruan mo akong magmahal nang tunay.
Na ayos lang ang hindi maging maayos sa gitna ng lumbay,
At may lakas sa pag-amin ng pusong marunong lumuha.
Ngunit sa gitna ng hindi pagkakaunawaan, puso mo’y aking nasira.
Ngayon, sa katahimikan ng malalim na gabi,
Maaari pa bang balikan ang kahapong nagdaan?
Mahanap ko kaya ang lakas na alagaan ka nang tama,
Kahit abutin pa ng maraming taon ang paghihintay,
Maaari bang ang pag-ibig ay maging walang hanggan?
Sa halip na ang takot na naging sanhi ng iyong pagkawala?
Feb 22
Feb 22, 2026 at 6:57 AM UTC
Araw at gabi sa isipan ko'y laging kang sumasagi,
'Di malilimutan ang pagsasamahan sa bawat sandali;
Kasama ka sa bawat oras na magdaan,
Kung kaya't mga problema ko'y nalilimutan.
Araw at gabi minamasdan ko ang kalangitan,
Ngunit iyong mukha lang ang aking namamasdan;
Sa'n man pumaroon, boses mo'y naririnig sa'king isipan,
Hanggang sa pagtulog ko'y laging kang napapanaginipan.
Araw ka ba? Dahil ikaw lang nagbigay liwanag,
Liwanag sa buhay kong puno ng bagabag;
At tulad ka ng gabi na puno ng katahimikan,
Anupat nagdala ng kapayapaan sa magulo kong kaisipan.
O' aking mahal, sinasambit sayo ng aking labi,
"Ikaw ba'y Araw at Gabi?"
Mar 25, 2024
Mar 25, 2024 at 10:00 AM UTC
nakilala mo na ang dilim
sa paglipad ng bawat segundo
at ng bawat minuto sa iyong puso
hindi naman dulot ng gabi ang lagim
sadyang nakakagambala lang ang kanyang ingay
sa mga tenga **** naghihintay ng walang humpay
narinig na niya lahat ng iyong lihim
sa mga paghikbi
at mga luha na bilisang pinapawi
sa bawat aliw, poot man, o panimdim,
ika'y humiga at magtimpi sapagkat ito'y hiram lang
manatili kang payapa, at ang iyong isipan.
manalangin ka na lamang ng taimtim
baka bukas aawit sayo ang mga puno't halaman
makakarating kana sa patutunguhan
Feb 5, 2021
Feb 5, 2021 at 11:48 AM UTC
Oh, kung masakit na sa paningin ang sinag ko
na dapat ay nagbibigay liwanag sayo,
Darating naman ang gabi, iiwas sa realidad, na kasama mo
Baka mas madali mo makita
ang kinang na hanap mo, kapag madilim at mag isa,
Ako, maghihintay lang na dumating yung oras na nakalaan sa akin para tanglawan mo.
Oct 14, 2020
Oct 14, 2020 at 10:43 AM UTC
at dito tayo magtatagpo
sa gitna ng pag agaw ng umaga at dilim
habang ika'y papaalis kasama ang mga bituin
ako'y lalayag para isabit sa kalangitan ang iyong araw.
magandang umaga,
magandang gabi.
May 11, 2020
May 11, 2020 at 5:12 PM UTC
Takot akong mag-isa
Takot akong harapin ang apat na dingding na makakasama ko sa gabi
Narinig na nila akong kumanta
Ng mga sinasayawan ng kalungkutan na himig
Takot akong kamustahin ng mga unan
na nabulungan na ng mga kasalanan
Ng mga kumpisal ng mga pinakatatago kong lihim
Naulanan na sila ng mga luha
Na resulta ng ilang beses na pagtalalo
Na nagaganap sa utak ko
Hindi ko rin maintindihan
Walang nakakaalam
Na sa tuwing gabi
na tanging ang hininga ko lang ang naririnig
tanging ang puso na lang ang may ganang magdagdag ng segundo, paulit-ulit
walang nakakaalam
kung gaano kalalim
ang nilalakbay ng isip,
kung gaano kadilim
ang suhestiyon ng mga boses na nagtatakda
madalas na akong nakikinig sa kanila
pinipilit kong bugawin
ngunit mas malakas sila sa ‘kin
natatakot akong mag isa
natatakot ako sa mga gabing ako lang ang nagpapatulog sa sarili
natatakot ako sa mga susunod pa
_hindi ka ba natatakot sa mga boses na nagpapatulog sa 'yo tuwing gabi?_
Jan 17, 2018
Jan 17, 2018 at 8:45 AM UTC
Kinain ng kadiliman ang buong daigdig
Saksi ang mga kabundukan at karagatan
Sa kung paanong natakpan ang araw na siya noong naghahari sa langit
Nagkalat sa buong lupain ang pait
Ang sakit
Dahil ang gabi dulot lang lagi ay kasawian
Ang gabi'y hindi isang kaibigan
Ang gabi'y hindi titigil hanggang ang kaisa isang tala na hawak mo ay kumupas na nang tuluyan
Nilamon ng kadiliman ang buo kong pagkatao
At oo
Sirang sira na ang taong sumulat ng binabasa mo
Sumasabog ang ulo na tila pagputok ng bulkan
Pumapatak ang luha na tila pagbuhos ng ulan
Ngunit lahat ng ito ay nakatago
Gaya ng kayamanan na nakadeposito sa bangko
Na kayang kaya ilabas ngunit mas piniling ipunin ng husto
Ipunin ang mga delubyo
Delubyo na animo'y itinanim sa dibdib ng isang demonyo
Nilamon ng kadiliman ang buo kong pagkatao
At walang sinuman ang makakasaksi nito
Dahil ang dilim ay inipon ko
At ang buhay ay kikitilin
Ang hininga ay lalagutin
Ang sarili ay papatayin
At lalong walang makakasaksi na sinuman
Dahil walang pakialam sa aking gabi ang sambayanan
Lahat ay nahihimbing sa kanilang kinaroroonan
At sa wakas
Nandito na ang wakas
Dec 28, 2017
Dec 28, 2017 at 8:57 AM UTC
binigyan na naman ng isang gabi ang puso para mahimlay
sa mga kumot na nagsilbing museleo ng naghihintay
hinagkan ang hangin at tinuring na kaibigan
binalikan ang buhay na unang kinamulatan.
Dec 10, 2017
Dec 10, 2017 at 3:31 AM UTC
*Lumalalim na ang gabi
Mga mata mo'y tila may sinasabi
Ang mga labi natin ay napapakagat
Bugso ng damdamin ay hindi na maawat
Sa bawat hakbang mo papalapit
Dibdib ko ay parang naiipit
Kinakabahan dahil ika'y nasa aking harapan
Wala ng atrasan di na ito mapipigilan
Ang iyong pisngi ay aking hahawakan
Dahan dahan kitang hahalikan
Bababa ang mga kamay ko sa bewang mo
Hilahin kita papalapit sa katawan ko
Paligid natin ay tila umiinit
Hindi na ata kailangan ang ating mga damit
Ang gabing ito ay atin na atin
Sulitin,
Wag sayangin,
Hindi tayo mabibitin*
Aug 23, 2015
Aug 23, 2015 at 11:24 AM UTC
Gabi-gabi
Sa unan ay dali tumatabi,
Nananabik
Mata'y pumikit, Bibig humilik,
Panaginip
Kitang mahagkan at makapiling.
Jul 17, 2015
Jul 17, 2015 at 3:58 PM UTC