मानसिया ना बेदर जायो।
बिसोरो बुजिनो गोरोँ, साननो बिजिरनो गोरोँ।
मालायनि जिउ फोजोबना दानख्लाब हाख्लाब सावनानै एबा रुनानै।
आयनि बिमाया आयखौ फोरोँदोँ,
आयनि बिफायानो आयखौ फोरोँदोँ।
बोराय बुरैहाबो दाय दं।
आयआ आंखौ फोरोँदोँ।
जिबनि मोदोम नानि मोदोम दानख्लाब हाख्लाब सावजानो- रुजानो आरो एवजानो।
आयआ जायखौ मोजां मोन्दोँ, आंबो बेखौनो।
आयआ जायखौ फोरोँदोँ आंबो बेखौनो सोलोँदोँ।
नाथाय आयआनो गासैबो नङा,
थांना थासान्दिल'सो आय।
बेनि उनाव रुंसारि आय?
सोर दंबावो रुंसारिनि आरोबाव?
आं देरबाय बुजिबायबो,
इयुनखौ आं मिथिबायबो थारैनो।
ना बेदरजोँ आङो थांना थायाखै।
नाथाय थांना थादोँ जायखिजाया गुबुन साबसिन आदारजोँ।
आं सानो आरो फोथायोबो।
जिबनि दरसे बेदरजोँ आंनि जिउआ रुजुजाया।
रुजुजायो होनोब्ला आंनि गुफुं आबुं सोलेर मोनसेजोँसो।
दा आं ना बेदर जालिया।
फाप जायो होननाबो आं सानाखै।
सान्दोँ आं- जायनि दाहार लानानै बे दाहारखौ सुखुफिन्नो हायाब्ला?
एबा दरसे बेदर जानायनि उनाव गावनि गासै गुफुं सोलेरखौनो गथायना होनो हायाब्ला?
गावनिखौ सना साननानै गुबुननिखौ नंथारै माबा मोनसे सान्नायानो जागोन।
आं दिनै समायलानोसो आवगायदोँ 'जायखौ आङो सोरजिनो हाया बेखौ आं खहा खालामा'।
अदेबानि 'जायनि जिउ आं होनो हाया बेनि थै आरो जिउखौ आंनो नाङा'।

आं नुनायमानि बुहुम मिथिँगानि गासैखौबो मोजां मोनबाय।
बुहुम मिथिँगानि बिफां-लाइफां, जिबि-जुनार, दाउसिन-दाउला,
दैमा-दैसा, हाजो-हायेन,
हारि-माहारि सुबुं गासैखौबो।
मोजां मोनबाय दंनायमानि नुनायमानि सान-अखाफोर-ख्रां,
हार्थखि-अलंबार, जोमै अखा सान्दुं।
मोजां मोनबाय मानसिनि राव फाव महर मुस्रि।
मोजां मोनबाय जिब जुनारनि गाबनाय रोजाबनाय गासैखौबो।
नाथाय अब्लाबो जायखौ आं दासिमबो नुवाखै।
जायखौ खोनादोँ मिथिदोँ बैयो सोर बेलाइ?
सोर बेलाइ माबादि जाखो?
एसेबां नुबाय बुहुमाव गोजोनबाय रंजाबायबो।
थेवबो सोरखौबा दाबो नुवाखै।
दा आं नुनायखौ नङा नुयैखौसो।
गोसो जादोँ नायनो, गोसो जादोँ बिजोँ मोखांजोँ मोखां रायज्लायनो।
जायनि बाथ्रा खोनाब्लानो गोजोन्नाय मोनो।
जायनि माया महिमा गोमो नाङो।
सोर बेलाइ?
बेसे अनसुला बेयो?
गोसो जायो आं बिनि आथिँआव।

आफाया जौ लोङो।
ओरैबादि लोङोदि थारैनो जोबोद गोदै गोथाव।
उन्दै समनिफ्रायनो आंनो दौआब्लाबो लुबैथि लुबैथि आंनि मेगन सिगाङाव लोँबोदोँमोन।
आंबो नायै नुयैनो लुबैनाया बांनायनिफ्राय बांबोदोँमोन।
सानसेखालि आं लोँबाय।
ओरैबादि लोँबाय आंबो ग्रद ग्रद ग्रद।
आंनि खर'आ गिदिँदोँमोन।
आं थावनाय मोनाखै एसेबां गोदैबो मोनाखै।
नाथाय ओरैबादि खुसि मोनबायदि-
आंनि गोसो, आंनि सोलेर गासैबो रंजाबाय मोसाबायबो।
आंनि खुगाजोँ मेथाइ ओँखारबोबाय।
मोसायै मोसायै आं मेंग्लिबाय।
लोरला जाबाय, आरो आंनि खर'आ गिलिरसिन जाबाय।
आं आरो सहायनो हालिया जानाय लोँनाय आं गोबाफिनबाय।
आंनाव दुखुआ फैबाय मानोना आं लोरबां जाबाय।
नंखायसो जौनि निसाया खहा खालामग्रा मेलेमनि सानस्रिखौ।
मेलेमनि एम्फौ फिसिग्रा जौ।
जौआ गोजौ नङा, बेयो नंगुबै सिंजौ।
फाथाल फुरिनि लामा दिन्थिग्रा सिंजौ राजा।
आंनि थाखाय नङा, नाथाय सोरनि थाखाय दाबो गोदै गोथाव जौआ?
थारैनो बिसोर मेलेम उनग्रा नङा,
मेलेमनि एम्फौ फिसिग्रा गोसोनि नेहाथ बान्दा।
जौआ जोँनि नङा, असुरफोरनिसो जौ।

गोदोनि बोखावै गवालफारा दानि सिरां जिल्ला सिलिकागुरियाव आयनि जोनोम जादोँमोन।
1972 मायथाइयाव बुंथिनाय जादोँ (भट होनाय बैसोजोँ गोरोबो)।
बिफानि मुंङा (आबौ) लक'नाथ बसुमतारी आरो बिमानि मुंङा (आबै) समबारि बसुमतारी।
गोदोनि सिख्ला समनि गांनैसो सावगारिनिफ्राय साननो हायो
बियो (आयआ) महर गोनां नायनो समायना सिख्लामोन (मादै-आयंमोनाबो सम सम रायखाङो सिख्ला समनि बाथ्रा बे रावैनो)।
खामानि, हाबा हुखा गोरोँ जाथ बर' सिख्लाथारमोन।
मानसिया जोनोम जायो,
खेबसे जुलि जायो,
जिउ थाजासे संसार जायो।
संसारनि मावनां हाबा मावो।
आयफानिफ्राय मिथिनाय जायो बिसोर 1989 (सो) मायथाइयाव जुलि जादोँमोन।
आफानि मुंआ लहेन: लहेन ब्रह्म।
बे बोसोरनि (जून,जुलाई,आगष्टसिम) सोदांनाय
लेगेसी डाटानिफ्राय मिथिनाय जायो आयनि बिफा लकनाथ।
जायखौ आं आबौ जायो।
बिनि बिफा बिष्टि।
जायखौ आं आजौ जायो।
आयनि थाखाय आबौ सोमोन्दो।
1972 मायथाइनि उन उन आमटेकायाव (दा आं-जोँ जेराव दं) गोदान हादान खुलिदोँमोन।
आफामोनहा गामि फसंफैयो सालगुरि।
आयनिया जमनागुरियाव।
बेनि उनावनो आयफानि जुलिया जादोँ।
दासिम आबौ लक'नाथआ दं।
बिनि बैसोआ दा स्नि-जिस्नि सो फ्राम जाबाय।
दाबो थखन थुवाखै,
लामा गोजान थाबायनो हानायनि अनगायैबो
साइकेल सालायनो हाबावो।
आबै समबारिया थैबाय।
2005-06 मायथाइनि बबेबा दानआव।
आबौनि न'आ आमायजोँ लोगोसे दासान्दि सान्तिफुराव।

जोहोलाव नीलेस्वर ब्रह्म।
बर' मेथाइ जारिमिनाव बिनि मुंङा जेब्लाबो सिगां।
नाथाय बियो सासे मेथाइगिरिल' नङामोन।
थुनलाइ, राजखान्थि गुबुन गुबुन बिथिँआव बिनि आखाय दं।
नाथाय आं मेथाइगिरि बादिल' गोसोखांनो नागिरदोँ।
बे दिनै आं बे जोहोलावखौ गोसोखांदोँ।
जाय जोहोलाव मुं मोननाय बर'नि जारिमिनाव।
नीलु होनना बर' फरायसाफोर आरो बर' लेखा गोरोँ जारिमिन फरायग्राफ्रा मिथिगौ।
1927 मायथाइ (11पेब्रुवारी) याव जोनोम मोननाय
नीलु आरो आंनि गेजेराव बेसेबा फाराग दं।
आं उन्दै, नाथाय नीलुआ?
बियो नैजि जौथाइनि सासे गेदेमा।
मेथाइ मुलुगाव बर' हारिखौ गिबिसिन फोजाखांग्रा बुंनांगोन।
बियो बर'नि खुगा मेथाइ,
सल', सलबाथाफोरखौ बुथुमना मेथाइ रोजाबदोँमोन।
बियो गोसो गोथारै बर' हारिखौ सिबिदोँमोन,
बर' हारिखौ जौगानाय लामाजोँ दैबायनो नाजाथारदोँमोन।
जारिमिना बुङो-
बियो बर'फोरनि गेजेराव सिगांसिनथार मेथाइ रोजाबगिरि।
उन्दैनिफ्रायनो मेथाइ रोजाबनो मोजां मोनग्रा
जोहोलाव नीलुआ दुलाराय मुलुगावनो बर'नि मेथाइखौ रेडिअ'नि गेजेरजोँ रोजाबना फोसावग्रोदोँमोन।
बियो बै समनि बर'नि अनसाइ आफादनि मददजोँ
1952 मायथाइयाव गिबिसिन मेथाइनि केसेत दिहुनदोँमोन।
1954 मायथाइयाव बियो लक्ष्णौ भातकान्देयाव  गोजौ थाखोनि (खाम, जथा, सेर्जानि गुबुन) दामनाय-देनाय सोलोँनो थांदोँमोन।
1984 मायथाइयाव जानाय दुलाराइ बर' थुनलाइ आफादनि जथुम्मायाव (गसाइगाव) बियो हारिमु आयदानि दैदेनगिरि बादि गावनि गियान मेँरोङै मावगोरोँ दिन्थिलांदोँमोन।
बयखौबो दाख्राय दाख्राय खावलायनानै गावनि सिमांआ जाफुंनो लामा लानाय समावनो बियो अब'थिरा जिउ गोमानायसै।
1 जानुवारी 1986 मायथाइयाव बियो मुलुग संसारखौ नागारलाङो।
नाथाय थालांबाय जारिमिन, मेथाइ देँखो गारां बिनि।
अराय थुलुंगागोनां बिनि सोरजि रोजाबथिनाय रैसुमै देँखो।

गिदिर गोलाव लोदो लोदो गुफुं।
नायनो समायना खोमा फायला ला
गारां गिदिर सोँब्ला गामि गंसे गोमफबलायथारो।
नै बोसोर सिगां थेफा बिजामादैया भुटाननिफ्राय लाना फैदोँमोन।
दमासि मागोनि समाव बोसोर गोदान (इंराजि)नि मुंङै
ना मा मानि जाखोथाय-
गिप बायदि होलांनायानोसै।
सिगांआव थेफानि फिसालाया सैमाखौ खाना दोनोमोन।
सोरबाफोर खावना लांनो हागौ होननानै।
दा गिदिर जानायखाय खालिया।
सैमानि मुंआ थनि
आगोलावनो थेफानि बिजामादैया मुंखौ दोनखा लांदोँ।
दा गामियाव बे मुंआनो मुंदांखा
गुबुन आरो नामा गैलिया।
थेफानि बिसि बिखंस्रि।
बिखंस्रिनि खिबु खिबु जेब्लाबो सैमायाबो।
फिसालाया सहराव फरायहैबाय।
दा बुंनो थाङोब्ला थेफाहा न'आव बिसि फिसाय सानैल'सो जायो।
एखमबा बाजाराव एबा हाथायाव थांब्ला
रावबो गैया जायो।
बे समाव सैमाया बिगोमाजोँ थांफानो गाबलायथारो।
नाथाय मा जानो?
हाथायाव थांफाब्ला लामायाव
दैखरगुरिनि सेँग्राफोरखौ बेदर जानो लाखिगोनसो सानो।
बेखायनो लांफाया।
अन्थाइ बन्थफोरजोँ खुइख्रुबबायनानै न' फारसे होहरफिनो।
सैमाया माब्लाबाबो हार्सिँङै थानो बायो।
थेफामोननि न'सुंसे सिँगिनि मोननि न'आ।
बेयावनो थांना थाहैयो सैमा थनियाबो।
लाजिया फांजिया बेयावनो ओँखामबो जायो
मेथाइबो जायो।
दा बेसेबा दानै दान सानै सान बारलांनायाव
थनिनि न'आ गंनै जाबाय।
बिखंस्रिनावबो थायो सिँगिनि मोननियावबो थायो।
थारमाने बेनाव जालाय बेनाव जालाय।
हाथायनिफ्राय बिगोमाया फैयोब्ला
लानजाय फायखन फायखन
मेथाइ बिनोबो लाजिथारा थनिया।
सिबाय मोनजायो गंनै न'आवनो।
बेखायनो लोदो लोदो जालायथारबाय।
दिनै बेसेबा स्रां अखाफोरनि सोरांजोँ।
डाइन रिँगा जाबाय
मोनाबिलिनि जानाय सम।
ओँखामखौ बिखंस्रिमोनहानिया सिगांसिन जायो।
उन्दुनावबो सिगांसिन उन्दुयो।
सिँगिनि मोनहानिया बांसिन सानफ्रोमबो बेदर जाग्राखाय
उनसिन उन्दुग्रा जाबाय।
बिखंस्रिया ओँखाम जाखांनानै दर्खँआव जमबाय थानाय
थनिनोबो ओँखाम होबाय।
सिबायाबो बाबांसिन जाबाय।
गोथाव नङा नामाथाय सोलाबायल'।
एसेयावनो सिँगिनिया गाबज्रिहरबाय-
थनि-थनि-थनि।
खोनानाय लोगो लोगो थनियाबो
ब्लद खारगार लांबाय।
ओरै बिखंस्रिया होनाय ओँखाम दालि ओँख्रि
लगायनाया लुन्दुन थालांबाय।
दिउ दिउ रागा जोँगारबाय बिखंस्रिया
सिँगिनिनि सायाव।
बेदर हारा, अमानि खोमोन ब्रेव ब्रेव गोनां बिगुर,
जानो हायै मेजेम थनिनो ज्राव गारना होबाय सिँगिनिया।
थनियाबो बेखौनो जानानै स्लिम खालामबाय।
उदै गेन्द्रा द्रा जालायबा
सिलायावनो दान्दिसे जिरायना थाबाय।
जाखां लोँखां सिँगिनियाबो
खामसालियाव थनिनि थाखाय बष्टा बना होबाय।
दा उन्दुथोँसै होननानै।
गावस्रा दर फांथेना दो उन्दुलांबाय।
थनियाबो ब्लदसो बिगोमानि फारसे थांबाय।

दद्रेद्रे मिनि लाजिसुलुलु
ओँखाम थफ्ला रुजुनबोला
समायनासिन नुबावो फ्रि फ्रि अखायाव।
रांखो दाहोनाया नायगोमोयो
बेसे समायना देमबारिया!
खाफालाव दंना गैया आंहा??
हे गसाइ! हे गसाइ!
मोसौ हग'बासो सुथि मोनो
मोसौ आथिँआव नांगोल फाला अख्लाबो
बिखा खायसिब देमबारिया।
बेसे मिनिथाव जादोँ सल'आ
हाब्रु गदा गदि मोसौ आथिँआव
रांखो दाहोनानि बुदिया
मा इसे दुखु गोनां फालाय!
मोसौनि थै रना रनि आथिँआव
मलम फोननाया-
देमबारिया मिनियोसो
बहाबा दुखुखौ दोनहरना
नाथाय रागा खरा बुदांआ
रांखोनि सायाव मा बिसार?
गबावगोन दाबि रांखो दाहोनाया??