Submit your work, meet writers and drop the ads. Become a member
Mar 2016
Main Hindi ..
Kabhi seene se mujhko lagaane waale,
Har geet me mujhe gungunane waale,
Bani jab bhi maa ki lori, meri god me wo so jaane waale,
mujhse ab rishta tod chuke hain..

Jinki har vedna ki main awaaz bani,
Khusi se gungunaye to main saaz bani,
Kabhi sone ke panno me khela karti thi,
Aaj chand harfo ki mohtaaj bani.

Kabhi tarannum me to kabhi tarano me thi,
Pyar me likhe afsaano me thi,
Yovan ke madhur sangeeto me thi,
Ishq me tadpe to main unki zubaano pe thi.

Kranti ke inqlaab me nihit, HarΒ Β do took jawab me thi,
Akhbaro ke panne bankar jamghat behisaab me thi,
Vijay Udghosh kiya jab tumne, bankar itihaas kitaab me thi.

Har roop me jinko mamta di, Jinka tha maine varan kiya,
Unhi beto me bhari sabha me tha mera cheer haran kiya,
Itne varsho se jo meri godi me fal fool rahe the,
Tadap uthi main, dekha jab, wo mujhko hi ab bhool rahe the.

Antarvedna ke gehan dard se roti main chitkaar rahi thi,
Har koi anjaan tha mujhse, aur main Bebas nihaar rahi thi..
Arvind Bhardwaj
Written by
Arvind Bhardwaj  Chandigarh
(Chandigarh)   
6.5k
   Aarushi Vijay
Please log in to view and add comments on poems